Rhanbarth Caerfyrddin-Penfro

Sir Gaerfyrddin

Yma yn Sir Gâr rydym yn byw yng nghysgod bwgan mawr sy'n bygwth dyfodol ein cymunedau Cymraeg a'n ffordd o fyw - ein Cyngor Sir. Yn groes i strategaeth honedig y Cyngor o "gynnal a hyrwyddo cymunedau Cymraeg", maent wrthi'n systematig yn lladd cymunedau Cymraeg y Sir.

1. Maent wedi cau 5 o ysgolion pentrefol Cymraeg y Sir yn ystod y 2 flynedd ddiwethaf ac mae mwy ar y ffordd. Yn eu cyhoeddiad diweddaraf sef y "Cynllun Trefniadaeth Ysgolion" maent yn bygwth ysgolion cynradd gyda llai na 90 o blant, sef bron pob ysgol gynradd Gymraeg yn y sir, gan ddweud mai ystyriaethau ariannol sydd bwysicaf. Cyhoeddodd Cymdeithas yr Iaith ein gwrth-bolisi sef dogfen "Llwyddiant Ysgolion Pentref". Byddwn yn pwyso ar y Cyngor newydd (yn dilyn etholiadau 10/6/04) i daflu'r Cynllun Trefniadaeth ysgolion.
2. Mae Cynllun Datblygu Unedol y Cyngor yn rhoi caniatad cynllunio i dros 12,000 o dai yn y Sir, fydd yn hwyluso mewnlifiad enfawr i'r Sir. Dyw'r ffigurau yma ddim wedi'u seilio ar unrhyw ymchwil i'r angen lleol am dai. Eto, mae gennym Alwad ar ddarpar Gynghorwyr i wrthwynebu'r Cynllun hwn a phan ffurfir y Cyngor newydd byddwn yn pwyso arnynt i daflu'r Cynllun a dechrau eto. Gobeithiwn gael cefnogaeth mudiadau etc, eraill i'r alwad yma.
3. Yn ogystal â herio'r Cyngor, byddwn yn pwyso ar siopau yn nhref Caerfyrddin i Gymreigio gan ddangos yr angen am Ddeddf iaith. Bydd yn rhaid i ni ymgyrchu yn erbyn Radio Sir Gâr hefyd sy'n argoeli i fod yn wasanaeth cwbl Seisnig (maent yn dechrau darlledu ym mis Mehefin).

Mae gennym griwiau o bobl yn gweithio yn y meysydd uchod - OND MAE MAWR ANGEN CYMORTH. Os alli di helpu trwy ffonio, llythyru, gosod posteri, gweithredu yna cysyllta, neu os wyt ti jyst moyn gwybod mwy.... cysyllta!

Sioned Elin

Sir Benfro

Gwybodaeth ar ymgyrchoedd y Gymdeithas yn Sir Benfro yn dod yn fuan.

Os gelli di helpu cysyllta gyda Sioned Elin